Kutxabank publikoa

Berria

Bilduk Kutxabankentzat nahi duen bide orri alternatiboan sakondu zuen atzo, Martin Garitano eta Juan Karlos Izagirreren azalpenen bitartez.

Gipuzkoako ahaldun nagusiak eta Donostiako alkateak ez zuten berrikuntzarik eskaini dagoeneko ezaguna den formula baten inguruan:

«Kutxabanken izaera publiko eta soziala berreskuratzeko» akzioak udalen eta diputazioen esku uztea nahi dute.

Funts baten inguruan ehundu nahi duten proiektuaren proposamenarekin iritsi zen berrikuntza.

Finantza erakundeak Euskal Herriko ekonomian bete dezakeen eginkizuna kontuan hartuta, inbertsio funts bat abian jartzea proposatu zioten Iñigo Urkullu Jaurlaritzako lehendakariari.

«Lanpostu duinak sortzea eta industria biziberritzea» izango luke helburu funts horrek.

"Arduraz jokatzeko garaia da, eta Gipuzkoako instituziook arduraz jokatuko dugu», esan zuen Garitanok, eta krisiari aurre egiteko eta ehun produktiboa sendotzeko finantza erakunde bat behar dela.

Inbertsio funtsa sortzea «Kutxabanken izaera publiko eta soziala berreskuratzeko» planaren barruan sartu zuten EH Bilduko kargudun biek. Urkullu lehendakariari eskatu zioten plan hori abian jartzea, «berriki Kutxabank pribatizatzearen aurka agertu delako».

Donostiako alkateak, berriz, funts hori sortzeko pausoak zehaztu zituen:

• lehen pausoa Urkulluk deialdia egitea litzateke eta
• Lehendakaritzaren eta EAEko kutxen sei erakunde sortzaileen arteko bilkura egitea —foru aldundiak eta hiru hiriburuetako udalak dira sortzaileak—,
• bide orria eta ondoren egin beharreko urratsak adosteko.

Kutxabank obsesioa. «Ez dugu ulertzen zergatik duen EH Bilduk hainbeste amorru eta obsesio hori Kutxabank gaiarekin». Josune Gorospe EAJko legebiltzarkidearen hitzak dira atzo Eusko Legebiltzarrean EH Bilduk Kutxabank pribatizatu ez dadin mozioaren eztabaidan. EAJk jakin nahi du zergatik «tematu» den gaiarekin ezker abertzalea.

Javier de Andres Arabako ahaldun nagusiak, berriz, are gehiago nahastu du eztabaida, ezustean garbi utzi baitu Vitalen akzioak saldu behar badira nahiago duela erakundefundatzaileen esku uzteaº. «Hori da arrazoizkoena, eta beste edozer gauza ez litzateke zuzena izango».