Kutxabank publikoa

Mario Fernandez Kutxabankeko presidentearen dimisioa erakundeko akzio bat ere kapital pribatuaren esku ez uzteko eragin den presio sozialaren ondorio da. Halere, Fernandezen erabakiak ez du esan nahi sakoneko aldaketarik izango denik:

• EAJk eta PPk duela bost urte erabaki zuten Mario Fernandez BBKren gailurrean jartzea, baita gero Kutxabanken ere, finantza-erakundeok pribatizatzeko helburu soilarekin; presidenteak hitzez hitz bete du alderdi haiek eskatu ziotena.
• EAJko ordezkariek, beste alternatiba eta proposamenik aintzat hartu gabe kutxak pribatizatzeko behin betiko erabakirik ez zezatela har eskatzeko izan ziren harremanetan, iragarri ziguten beren helburua kutxak banku-fundazio bihurtzea zela, eta aurrerago hitz egingo zutela Espainiako Bankuarekin erreserba funtsari buruz. Halaber, kapital pribatuaren sarrera saihestu ezinekoa izango zela ere aurreratu zuten. Mario Fernandezen jarrerarekiko alde bakarra dago: EAJk operazioa epeka egin nahi zuen, hasieran argitu gabe ibilbidearen amaiera zein izango zen.
• Gure ustez, Mario Fernandezen dimisioaren erroan arrazoi taktiko hutsak daude. EAJren eta dimisioa eman duen presidentearen arteko talkaren atzean hauteskundeak laster izatea eta euskal baliabide komunitarioen harrapaketak eragin duen presio soziala daude.
• Kutxabankeko presidentearen dimisioak ez du hankasartzea konponduko, eta pribatizazioaren aitzindariek hartutako bidetik ez dago pribatizazioaren burugabekeriarako soluziorik.

Horregatik exigitzen dugu abagune hau balia dadila pribatizazio prozesuari atzera eragiteko, kutxak sortu zituzten herri-erakundeei akzioen jabegoa itzultzeko eta euskal esparruan lege-aldaketa bat egiteko, horrela Euskal Kutxen-Kutxabanken izaera publiko eta soziala bermatu eta areagotzeko aukera izan dezagun.

Kutxabanken pribatizazioaren kontrako plataforma