Kutxabank publikoa

Jabetzaren parte bat salgai jartzea baztertu du bankuak 2019. urtera arteko negozio planean. Enpresetan dituen parte hartze «estrategikoak» hartuko dituzte fundazioek

Berria

Kutxabankek ez du bazkide pribaturik bilatuko eta ez da burtsara aterako. Jabetzaren parte bat salgai jartzea ez da erakundearen lehentasun bat, eta ez da halakorik aurreikusiko 2019. urtea arte indarrean egongo den negozio planean. Mario Fernandez bankuko buru zela orain dela urte eta erdi hasitako eztabaida itxi du Gregorio Billalabeitia bankuko presidenteak. Hala, Kutxabanken jabetza osoari eutsiko diote BBK, Kutxa eta Vital aurrezki kutxa ohiek sortu zituzten banku fundazioek.

Cebek Bizkaiko patronalak antolatuta, finantza sektorearen egoerari buruzko hitzaldia eskaini zuen atzo Gregorio Billalabeitiak Bilbon. Ikusmin handia piztu zuen agerraldiak, bankuaren norabidea zein den presidentearen beraren eskutik entzuteko lehen aukera zelako, Mikel Cabiecesi egindako ordainketen eskandaluaren ondotik. Ikusleen artean zeuden Arantxa Tapia Ekonomiaren Garapen eta Lehiakortasunerako sailburua, Juan Mari Aburto Bilboko alkatea, edo Alberto Sanchez Erauskin Euskalteleko presidentea.

Ekoneus-Kutxabank Publikoaren iritzia: Mario Fernandezek gauzatu nahi izan zuen pribitizazioaren lehenengo borroka irabazi dugu, jende eta erakunde askok erakutsitako laguntzari esker. Hala ere arriskuak hor jarraitzen du. Gainera, beste bi helburu falta zaizkigu: demokratikoa izatea (patronoek ez dute aniztasun politikoa islatzen inondik inora) eta soziala izatea (lehen gizarte ekintzara irabazien %30a zihoan eta orain %10 baino gutxiago izatea nahi dute; komisioak gero eta asaldagarriagoak dira, etxe kaleratzeak...).

HALA ERE, ZORIONAK DENOI